ევროპარლამენტი სათამაშოების უსაფრთხოების მოთხოვნების გამკაცრებას ითხოვს

ევროკავშირში სათამაშოების უსაფრთხოების კონტროლი მაღალ დონეზეა. მიუხედავად ამისა, ევროპარლამენტი უსაფრთხოების მოთხოვნების გამკაცრებას ითხოვს. ტექნოლოგიების განვითარების კვალობაზე ახალ-ახალი რისკები წარმოიქმნება. ამასთანავე, მეცნიერული კვლევების შედეგად, იკვეთება ისეთი საფრთხეები, რომლებიც ადრე არ იყო ცნობილი. შესაბამისად, საკითხის მარეგულირებელ კანონმდებლობასა და კონტროლის განხორციელებას სათანადო ადაპტირება სჭირდება.

ევროპარლამენტის ინიციატივით ჩატარებული კვლევის საფუძველზე, შემდეგი ძირითადი პრობლემები გამოიკვეთა:

• ბევრი მავნე ნივთიერების ზღვარი, რომელიც სათამაშოებშია დაშვებული, საკმაოდ მაღალია და ბავშვების სათანადო დაცვას ვერ უზრუნვეყოფს.
• ზოგიერთი ქიმიური ნივთიერების ზღვრები დადგენილია მხოლოდ 36 თვემდე ასაკის ბავშვებისათვის და პირში ჩასადებად განკუთვნილი სათამაშოებისათვის, თუმცა ეს ნივთიერებები უფროსი ასაკის ბავშვებისთვისაც იგივენაირად მავნებელია. ამავე დროს, სათამაშოების მწარმოებელთა ნაწილი ზემოაღნიშნულ შეზღუდვას მარტივად უვლის გვერდს ეტიკეტზე იმის მითითებით, რომ სათამაშო 36 თვეზე უფროსი ბავშვებისთვისაა განკუთვნილი, მაშინ როდესაც ეს აშკარად არ შეესაბამება სიმართლეს. ამ ხრიკის გამოყენებით, რიგი მავნე ნივთიერების შემადგენლობა სათამაშოებში კანონდარღვევად აღარ ითვლება.
• სათამაშოების ბაზრის ზედამხედველობა ჯერ კიდევ არასაკმარისი და არათანაბარია ევროკავშირის წევრ ქვეყნებს შორის. შესაბამისად, დიდია მავნე სათამაშოების მოცულობა, რომელიც ევროკავშირის ბაზარზე იყიდება. ევროკავშირის არასასურსათო პროდუქტების სწრაფი განგაშის სისტემაში (EU Safety Gate), რომლის მეშვეობითაც შესაბამისი მაკონტროლებელი უწყებები საფრთხის შემცველი საქონლის შესახებ ინფორმაციას ავრცელებენ, 2020 წელს სათამაშოებმა პირველი ადგილი დაიკავა (შეტყობინებების 27%), ხოლო 2021 წელს - მეორე ადგილი (19%).
• საფრთხის შემცველი სათამაშოებიდან ბევრი იმპორტირებულია და მათი ოდენობა განსაკუთრებით დიდია ონლაინმაღაზიებში, რომლებიც ისევე ვერ კონტროლდება, როგორც ჩვეულებრივი მაღაზიები.

კვლევის საფუძველზე, ევროპარლამენტმა ევროკომისიასა და ევროკავშირის წევრ ქვეყნებს მოსთხოვა დამატებითი ზომები მიიღონ ევროკავშირის ბაზარზე განთავსებული სათამაშოების უსაფრთხოების უზრუნველსაყოფად.

ზემოთ აღწერილი პრობლემები საქართველოსთვისაც საგულისხმოა, განსაკუთრებით კი იმ ფონზე, როდესაც ჩვენთან სათამაშოების უსაფრთხოების კონტროლი მხოლოდ 2021 წლის 1 ივლისიდან დაიწყო და ჯერჯერობით მისი მასშტაბები მცირეა. სათამაშოების უსაფრთხოების კუთხით საქართველოს კანონმდებლობის ევროკავშირთან დაახლოება ევროკავშირ-საქართველოს ასოცირების შეთანხმებითაა გათვალისწინებული. ამ საკითხზე მეტი ინფორმაციისათვის იხილეთ https://www.momxmarebeli.ge/articles/all/6777.