სახიფათო სათამაშოები

ფტალატების ყველაზე მაღალი შემცველობა (33%) ამაზონში ნაყიდ საბავშვო ბურთში აღმოჩნდა. მას მოსდევდა შაინში ნაყიდი თოჯინა, რომელიც ფტალატების 14% შეიცავდა და თემუში ნაყიდი ბურთი, ფტალატების 7% შემცველობით. 

ამ მავნე ნივთიერების ჭარბი ოდენობა ძირითადად საბავშვო ბურთებში (6 ნიმუში) იყო ნაპოვნი.

ევროკავშირში სათამაშოების, ისევე როგორც ბევრი სხვა სამომხმარებლო პროდუქციის უსაფრთხოება სახელმწიფო კონტროლს ექვემდებარება. ფტალატების გადაჭარბებული შემცველობა ევროკავშირის წევრი ქვეყნების სავაჭრო ქსელებში განთავსებულ სათამაშოებშიც არაერთხელ გამოვლენილა. თუმცა, ასეთ შემთხვევებში, შესაბამისი მაკონტროლებელი უწყებები მავნე პროდუქციის ბაზრიდან ამოღებასა და პრევენციული ზომების გატარებას უზრუნველყოფენ. ონლაინმაღაზიების კონტროლი კი, რომლებიც ევროკავშირის მიღმა მდებარეობენ, გამოწვევას წარმოადგენს. დანიის გარემოს დაცვის მინისტრის განცხადებით, ამ პრობლემასთან გასამკლავებლად მთავრობა სპეციალურ სამუშაო ჯგუფს ქმნის. მისი თქმით, ონლაინპლატფორმები პასუხიმგებელნი უნდა იყვნენ ევროკავშირში გაყიდულ და ევროკავშირის მოქალაქეებისათვის შეთავაზებულ საქონელზე. ეს პლატფორმები ჯანმრთელობისათვის მავნე პროდუქციას არ უნდა ყიდიდნენ.

მეტი ინფორმაცია და შემოწმებული სათამაშოების სრული სია იხ. ბმულზე https://taenk.dk/kemi/visit-our-english-version/one-five-toys-bought-online-contain-harmful-phthalates.

საქართველოს რაც შეეხება, აქ სათამაშოების უსაფრთხოების მოთხოვნები და სახელმწიფო კონტროლი 2021 წლიდან ამოქმედდა, თუმცა, კონტროლი მეტად სუსტია, რაზეც არაერთხელ დაგვიწერია. ისიც საგულისხმოა, რომ ფტალატებთან დაკავშირებით საქართველოში არანაირი შეზღუდვა არ მოქმედებს. ზემოაღნიშნული ინფორმაციის გარდა, ქართველი ბავშვებისათვის ამ საფრთხის არსებობაზე ჩვენს მიერ ჯერ კიდევ 2016-2017 წლებში ჩატარებული კვლევები მოწმობდა, როდესაც საქართველოს სავაჭრო ქსელში შეძენილი 44 სათამაშოდან ფტალატების გადაჭარბებული ოდენობა 21 ნიმუშში აღმოვაჩინეთ.