ბოლო ცვლილებები

სემინარი ჟურნალისტებისათვის
სურსათის უვნებლობის კონტროლისათვის საჭირო კადრები
უნაკლო ნივთის მიწოდების ვალდებულება
წარმატების ამბავი - მომხმარებლისათვის დაბრუნებული თანხა
მოგზაურობის ხარვეზები
პარფიუმერიულ-კოსმეტიკური საშუალებების შემოწმება
ბეჭდური პუბლიკაციები
კარფურში შეძენილი კარაქი „ვალიო“
სურსათის შემოწმება არასაკვებ საღებავებზე
სურსათის ეროვნული სააგენტოს 2019 წლის მეორე კვარტლის კონტროლის შედეგები

კარფურში შეძენილი კარაქი „ვალიო“
კარაქი, რძის ნაწარმი,

2019 წლის 29 მარტს მომხმარებელმა ფეისბუქზე კომენტარით გვაცნობა, რომ სავაჭრო ცენტრ „ისთ ფოინთში“ მდებარე მაღაზია „კარფურში“ იყიდება კარაქი „ვალიო“, რომელსაც არაერთგვაროვანი შეფერილობა და ცუდი გემოს აქვს.

საჩივრის გადამოწმების მიზნით, 2019 წლის 1 აპრილს, მომხმარებლის მიერ მითითებულ მაღაზიაში შევიძინეთ კარაქი „ვალიო“ (დაფასოების თარიღი - 29.03.2019, ვარგისიანობის ვადა - 13.04.2019) და ჩავაბარეთ ლაბორატორიაში ორგანოლეპტიკური ანალიზისათვის. 

  ჩვენს მიერ შეძენილ ნიმუშსაც არაერთგვაროვანი შეფერილობა ჰქონდა.

ლაბორატორიიდან მიღებული პასუხის მიხედვით: „ექსპერტიზაზე წარმოდგენილი კარაქის ნიმუში (ეტიკეტზე წარწერით „კარაქი ვალიო“) გამოკვლეული ორგანოლეპტიკური მაჩვენებლებით (არაერთგვაროვანი შეფერილობა, გემო, სუნი) არ შეესაბამება ამ დასახელების პროდუქტისათვის სტანდარტით დადგენილ მოთხოვნებს“, ასევე: „გარეთა, შედარებით მუქ ფენას დაჰკრავს სიმძაღის სუნი და გემო“.

გაიგზავნა წერილები სურსათის ეროვნულ სააგენტოში და მაღაზიაში.

------

2 მაისს მივიღეთ პასუხი სურსათის ეროვნული სააგენტოდან, რომ სააგენტომ ჰიპერმარკეტ „კარფურში“ აიღო „ვალიო“-ს 82% კარაქის ნიმუში და ლაბორატორიულად შეამოწმა შემდეგ მაჩვენებლებზე: სალმონელა და Listeria monocytogenes, რის შედეგადაც დარღვევა არ გამოვლინდა.

აღნიშნული დასახელების პროდუქტის ჩვენი დაკვეთით ჩატარებული ორგანოლეპტიკური ლაბორატორიული კვლევის შედეგად, გამოვლენილი იყო სიმძაღის სუნი და გემო, რაც, სავარაუდოდ, არასათანადო ტემპერატურულ რეჟიმში პროდუქტის შენახვასთან იყო დაკავშირებული. შესაბამისად, ჩვენთვის გაუგებარი დარჩა, თუ რატომ არ შემოწმდა პროდუქტის შენახვის პირობები ჰიპერმარკეტ „კარფურში“ და შენახვა-ტრანსპორტირების პირობები პროდუქტის სადისტრიბუციო კომპანიაში/ებში. ამის თაობაზე კვლავ მივმართეთ სააგენტოს.

------

3 ივნისს სააგენტოდან მივიღეთ პასუხი, რომლის მიხედვითაც, სააგენტომ შეამოწმა ჰიპერმარკეტ „კარფური“-ს კარაქით „ვალიო 82%“ მომმარაგებელი შპს ევროპროდუქტის სამაცივრე საწყობი და სატრანსპორტო საშუალებები. დარღვევები არ გამოვლინდა.

ჩვენი მიმართვის საფუძველზე, სეს-ის რეაგირება მისასალმებელია. თუმცა, კვლავ გაუგებარი რჩება, თუ რატომ არ შემოწმდა პროდუქტის შენახვის პირობები თავად ჰიპერმარკეტ „კარფურში“, სადაც კარაქის გაფუჭებული ნიმუში აღმოვაჩინეთ. ამის თაობაზე კვლავ მივწერეთ სააგენტოს.

------

11 ივნისს სააგენტოდან მივიღეთ მორიგი პასუხი, საიდანაც ირკვევა, რომ „კარფურში“ პროდუქტის შენახვის პირობები ჯერ კიდევ 15 აპრილს შემოწმებულა, მაშინ როდესაც ლაბორატორიული შემოწმებისათვის ნიმუშის აღება მოხდა. დარღვვები არ გამოვლენილა.

სამწუხაროა, რომ ჩვენი მხრიდან არაერთი მიმართვის მიუხედავად, სააგენტოში საკმარისი ყურადღებით მაინც არ ეკიდებიან საჯარო ინფორმაციის გაცემას და ელემენტარული ინფორმაციის მისაღებადაც კი საკმაოდ ხშირად გვჭირდება რამდენიმე წერილით მიმართვა. არაეფექტურად იხარჯება თავად სააგენტოს თანამშრომელთა დრო, საზოგადოებაში კი ღვივდება ეჭვები, რომ სააგენტო რაღაცას მალავს.

------

2019 წლის 5 ივლისს, სავაჭრო ცენტრ „ისთფოინთში“ მდებარე მაღაზია „კარფურში“ განმეორებით შევიძინეთ კარაქი „ვალიო“, რომელსაც კვლავ აღენიშნებოდა არაერთგვაროვანი შეფერილობა და ჩავაბარეთ ანალიზისათვის ლაბორატორიაში.

ლაბორატორიდან მიღებული პასუხით, „ექსპერტიზაზე წარმოდგენილი კარაქის ნიმუში გამოკვლეული ორგანოლეპტიკური მაჩვენებლებით (არაერთგვაროვანი შეფერილობა, გემო, სუნი) არ შეესაბამება ამ დასახელების პროდუქტისათვის სტანდარტით დადგენილ მოთხოვნებს“. დასკვნაში წერია, რომ „გამოსაკვლევი ნიმუშის გარეთა შედარებით მუქ ფენას დაჰკრავს სიმძაღის სუნი და გემო“ და „არაერთგვაროვანი შეფერილობა“.

გაიგზავნა წერილები სურსათის ეროვნულ სააგენტოში და მაღაზიაში.

----------

9 სექტემბერს მივიღეთ პასუხი სურსათის ეროვნული სააგენტოდან (წერილი 31 ივლისითაა დათარიღებული), რომლის მიხედვითაც სააგენტომ კვლავ შეამოწმა როგორც „კარფური“, ისე კარაქ ვალიოს მიმწოდებელი შპს „ევროპროდუქტი“. კარაქ „ვალიოს“ რეალიზაცია „კარფურში“ აღარ ხდებოდა და ასაწონი კარაქი „ვალიო“ საერთოდ ამოღებული იქნა რეალიზაციიდან. შპს „ევროპროდუქტს“ კი აღნიშნული კარაქის პარტია უკვე გაყიდული ჰქონდა. „კარფურსა“ და „ევროპროდუქტის“ საწყობში არსებული შენახვის პირობების შემოწმებისას რაიმე დარღვევა არ გამოვლენილა. 

ჩვენ მომავალშიც მოვიძიებთ ამ პროდუქტს „კარფურში“ და თუ კვლავ გაიყიდება, ისევ შევამოწმებთ.




print version
15:55:19 2019-04-10

კომენტარის დამატება

ქეთევანი   23:03:41 2019-09-09  უპასუხე   
კარაქი ვალიო, სავარაუდოდ, ფალსიფიცირებული იყიდება ჩვენში, არა მარტო ასაწონ, არამედ, დაფასოებულ „კარაქსაც“ როცა კი მიყიდია, ყოველთვის მარგარინის გემო აქვს


ყველა კომენტარის გამოჩენა



ეს საიტი ეკუთვნის არასამთავრობო ორგანიზაციას "საქართველოს სტრატეგიული კვლევებისა და განვითარების ცენტრი"

ჩვენი მისამართია: თბილისი, დელისის I შესახვევი №5ა, ტელ: 239 90 19/18

ელფოსტა: office@csrdg.ge
ვებგვერდი: http://www.csrdg.ge/

admin login

© csrdg.ge
design.ge